Qəbzə diqqət edin: Müştəridən xəbərsiz yazılan xidmət haqları - ÖZƏL

Son günlər sosial şəbəkələrdə bəzi restoran və kafelərdə təqdim olunan ödəniş qəbzlərinin paylaşılması geniş müzakirələrə səbəb olub. Paylaşılan qəbzlərdə təkcə yeməklərin deyil, adi suyun və parkinqin qiymətlərinin də gözlənilmədən yüksək olduğu görünür. Bundan əlavə, menyuda əvvəlcədən qeyd olunmayan və müştəriyə izah verilməyən "xidmət haqqı"  da hesabın üzərinə əlavə olunur. Bu cür halların artması ictimaiyyətdə narahatlıq doğurur və "qiymət şəffaflığı", "məcburi xidmət haqları" kimi məsələləri yenidən gündəmə gətirir. 

İctimai iaşə obyektlərində qiymətlərin şəffaf şəkildə təqdim edilməməsi və əlavə ödənişlərin gizli tutulması ilə bağlı vətəndaşlar hansı hüquqi addımları ata bilər?

Mövzu ilə bağlı vəkil Mehman Muradlı Olaylar.az-a açıqlama verib: 
" Faktiki olaraq restoranlarda və digər iaşə obyektlərində belədir ki, bəzən müştərinin sifariş vermədiyi  məhsulların qiymətini təqdim edirlər. Xidmət haqqı olaraq 10-15 faiz də əlavə hesablanır. Parklanma məsələsi də buna daxildir. Parklanmanı birbaşa olaraq "Azparking" həyata keçirir. Həmin restoranlar parklanma üçün əlavə pul alır və bunu da hesaba əlavə edirlər. Bu isə artıq "İstehlakçıların hüquqlarının müdafiəsi haqqında" qanunun birbaşa pozulmasıdır. 10-15 faiz xidmət haqqının tutulması, menyuda  göstərilmirsə və istehlakçı bunu əvvəlcədən seçə bilmirsə, bu, artıq istehlakçının "cibinə girmək" deməkdir. Açıq desək, bu birbaşa oğurluqdur. Bunun başqa adı yoxdur. Bunların hamısı "İstehlakçıların hüquqları haqqında" qanunun tələblərinə ziddir. Belə hallarda istehlakçılar yalnız Antiinhisar və İstehlak Bazarına Nəzarət Dövlət Agentliyinə müraciət etsələr, həmin məsələlərlə bağlı tədbirlər görülə bilər".

Zeynəb Mustafazadə