Azərbaycan Ukraynaya elektrik paylayıcı şəbəkələrin bərpası üçün avadanlıq göndərəcək

Azərbaycan Ukraynaya elektrik paylayıcı şəbəkələrin bərpası üçün avadanlıq göndərməyi planlaşdırır.

Olaylar.az Trend-ə istinadən xəbər verir ki, bu barədə Ukraynanın energetika naziri German Qaluşenko ilə Azərbaycanın Ukraynadakı fövqəladə və səlahiyyətli səfiri Seymur Mərdalıyevin görüşündə məlum olub.

Səfir xatırladıb ki, Prezident İlham Əliyev iyulun ortalarında Azərbaycanın Energetika Nazirliyinə 7,6 milyon dollar vəsait ayrılmasına dair sərəncam imzalayıb. Vəsaitin Ukraynaya humanitar yardım üçün sərf olunması nəzərdə tutulub. Bununla əlaqədar olaraq, yaxın zamanda Ukraynaya elektrik paylayıcı şəbəkələrin bərpası üçün avadanlıqların göndərilməsi planlaşdırılır.

German Qaluşenko Azərbaycana Ukraynanın enerji sektoruna göstərdiyi və xüsusən ötən qış Ukraynanın enerji sistemini dəstəkləməyə kömək etmiş yardıma görə minnətdarlıq edib.

"Azərbaycanla enerji sektorunda əməkdaşlığımızı yüksək qiymətləndiririk və bu əməkdaşlığın güclənəcəyinə çox ümid edirik", - deyə ukraynalı nazir deyib.

Ukraynanın Energetika Nazirliyindən, həmçinin, ölkənin Azərbaycandan enerji sektoru üçün 50 ehtiyat elektrik stansiyası və 45 güc transformatorundan ibarət 10 humanitar yardım aldığını qeyd edib.