Səkkiz noyabrda toydadır vətən!

Sinəndən asılan daş görmüşəm mən,

Qüssədən ağaran baş görmüşəm mən.

Hərdən gözlərində yaş görmüşəm mən,

Yarın da axı o taydadı, vətən!

***

Halalın küncü yox, güncdən yanadı,

Haramın evləri xana-xanadı.

Əzəldən bilirsən, öncə anadı,

Sonra sən gəlirsən, qaydadı, vətən!

***

Taleyin işidi, dövran, çağ belə,

Qayğıya bələnib uca dağ belə.

Yalandan demərəm bostan, bağ belə,

Sinəmdə ürəyim boydadı vətən!

***

Gözü kor olanın gözündən öpüb,

Dağa dırmaşanın dizindən öpüb.

Qışı yola salıb, üzündən öpüb,

Bahar havasında, yaydadı vətən!

***

Yer, göy də qızardı şəhid qanıyla,

Günəş üzə güldü qızıl danıyla.

Ordusu, Ali Baş Komandanıyla,

Səkkiz noyabrda toydadı vətən!

Fəxrəddin Səfərov