ABŞ birajalarında inflyasiya və faiz artımı gözləntiləri fonunda eniş qeydə alınıb – ÖZƏL

Olaylar.az xəbər verir ki, ABŞ Əmək Nazirliyinin oktyabr ayı üzrə inflyasiya hesabatından sonra Federal Ehtiyat Sisteminin (FES) pul-kredit siyasətini sərtləşdirəcəyi gözləntiləri güclənib və nəticədə Uoll-stritin əsas indeksləri çərşənbə axşamı hərracları enişlə başa vurub. İnflyasiya göstəricilərinin proqnozları üstələməsi fonunda bazar iştirakçıları FES-in dekabrda faiz dərəcəsini artıracağını tam (100%) qiymətləndirir. Hərracların yekununa əsasən: Dow Jones indeksi 0.3% azalaraq 52 231.89 punkta; S&P 500 indeksi 0.38% enərək 7 520.93 punkta; Nasdaq Composite indeksi isə 0.74% itki ilə 25 065.87 punkta düşüb.

Dow Jones indeksində ən çox dəyər itirən şirkət "Nvidia" (-5.5%) olub. Şirkətin baş icraçı direktoru Censen Huanqın Çin casusu ola biləcəyi ehtimal edilən qadınla əlaqələri və Çin firmaları vasitəsilə ən azı 7.5 milyard dollarlıq çip tədarükünə şərait yaratması barədə xəbərlər fonunda səhmlər son iki sessiyada 9.6% ucuzlaşıb. S&P 500-də isə ən böyük itkiyə, 200 milyon dollar mənfəət azalması xəbərdarlığı edən və xərclərin ixtisarı proqramını təqdim edən "Skydance" (-7.6%) məruz qalıb. Birja nəhənglərindən "Microsoft", "Apple" və "Alphabet" də ucuzlaşanlar arasında yer alıb.

Buna baxmayaraq, rüblük mənfəətini 2.5 dəfə artıran "Occidental Petroleum" (+2%), 3 milyard dollarlıq "buyback" proqramı elan edən "Steel Dynamics" (+3.8%), eləcə də "Lucid Group" (+4.7%), "Amazon" (+1.5%) və "PepsiCo" (+1.2%) səhmləri günü artımla başa vurub.