Tramp seçkilərin nəticələrinə İran amilinin təsir etdiyini bildirib

ABŞ Prezidenti Donald Tramp Konqresə keçirilən aralıq seçkilərin nəticələrini qəbul etdiyini və Demokratlar Partiyasının nümayəndələri ilə əməkdaşlığa hazır olduğunu bildirib.

Bu barədə o, "The New York Times" qəzetinə müsahibəsində danışıb.

"Bu nəticələri tamamilə qəbul etməyə hazıram. Biz demokratlarla əməkdaşlıq edəcəyik və onlarla işləməyə başlamağı səbirsizliklə gözləyirik. Yəqin ki, ortaq bir yol tapacağıq", - deyə Donald Tramp bildirib.

Qeyd edək ki, səslərin bir hissəsi hesablandıqdan sonra Demokratlar Partiyası həm Senatda, həm də Nümayəndələr Palatasında çoxluq əldə edir.

Tramp Respublikaçılar Partiyasının seçkilərdəki nəticələrini şərh edərkən özünün namizədlər siyahısında yer almamasını da məğlubiyyətin səbəblərindən biri kimi göstərib.

"Mən səsvermə bülletenində yox idim. Əgər orada olsaydım, biz böyük fərqlə qalib gələrdik", - deyə ABŞ Prezidenti "Truth Social" sosial şəbəkəsində yazıb.

ABŞ Prezidenti aralıq seçkilərinin nəticələrinə təsirlərdən də danışıb.

"Fox" telekanalına verdiyi müsahibədə İranla münaqişənin Konqres üçün keçirilən aralıq seçkilərində respublikaçıların uğursuzluğuna qismən təsir göstərdiyini diqqətə çatdırıb.

"Mən düşünürəm ki, bu qismən İranla bağlı olub", -deyə o, müsahibədə bildirib.

Xatırladaq ki, iyulun 8-də ABŞ Prezidenti Donald Tramp atəşkəsin pozulduğunu bəyan edərək İrana qarşı yeni zərbələrə göstəriş verib. Buna cavab olaraq İran ABŞ-nin Fars körfəzi regiondakı hərbi obyektlərini raket və pilotsuz uçuş aparatları ilə hədəfə alıb. Vaşinqton İranın danışıqlara qayıda biləcəyini istisna etməsə də, Hörmüz boğazının təhlükəsizliyi, nüvə proqramı və digər məsələlər ətrafındakı fikir ayrılıqları sülh prosesinin gələcəyini qeyri-müəyyən saxlayır. Hazırda Hörmüz boğazında ticarət gəmiçiliyi yenidən demək olar ki, iflic vəziyyətə gəlib.