İran Hörmüz boğazında gəmilərə hücum üçün yeni taktika tətbiq edir – ÖZƏL

Olaylar.az xəbər verir ki, İran ABŞ və İsrailin fevralın 28-də başlayan zərbələrindən sonra dünya neft və mayeləşdirilmiş təbii qaz daşımalarının beşdə birinin reallaşdığı Hörmüz boğazında nəzarəti ələ keçirməyə və Vaşinqtona təzyiq göstərməyə çalışır. İki yüksəkrütbəli iranlı mənbənin "Reuters"ə verdiyi məlumata görə, Tehran dünya neft qiymətlərinin yüksək qalmasını təmin etmək və ABŞ-da keçiriləcək aralıq seçkilərinin nəticələrinə təsir göstərmək məqsədilə gəmilərə hücum taktikalarını dəyişib.

Ali rəhbərlik səviyyəsində qəbul edilən yeni strategiyaya əsasən, İran təyin etdiyi məhdudiyyətləri pozan gəmilərə qarşı təxminən 10 gün əvvəldən etibarən hücumların həm növünü, həm də intensivliyini dəyişərək zərbələrin sayını artırıb. Əsas məqsəd ABŞ və müttəfiqlərinin neft qiymətlərini endirmək cəhdlərinin qarşısını almaqdır. ABŞ hərbi rəsmisi də İranın taktikanı kəskin dəyişdiyini təsdiqləyib; belə ki, ABŞ tərəfindən radar imkanlarının böyük hissəsi sıradan çıxarıldıqdan sonra İslam İnqilabı Keşikçiləri Korpusu hədəfləri, o cümlədən ABŞ hərbi gəmilərini müəyyənləşdirmək üçün kiçik qayıqlarda silahsız müşahidəçilərdən istifadə etməyə başlayıb.