Çempionlar Liqasının finalları bu stadionlarda keçiriləcək

Avropa Futbol Assosiasiyaları İttifaqının (UEFA) İcraiyyə Komitəsi 2027/28 və 2028/29 mövsümlərində Çempionlar Liqasının finallarının keçiriləcəyi stadionları təsdiqləyib.

Bu barədə qurumun saytında məlumat verilib.

2027/28 mövsümünün finalı Münhendəki "Alyans Arena" stadionunda keçiriləcək. 2028/29 mövsümünün həlledici oyunu isə Barselonadakı "Kamp Nou" stadionunda baş tutacaq. Qərar Yunanıstanın Saloniki şəhərində keçirilən UEFA İcraiyyə Komitəsinin iclasında qəbul edilib.

Bundan əlavə, UEFA Avropa Liqası və Konfrans Liqasının finallarının keçiriləcəyi stadionları da müəyyənləşdirib. 2027/28 mövsümündə həlledici oyunlar müvafiq olaraq Buxarest və Turində, 2028/29 mövsümündə isə Belqrad və Budapeştdə keçiriləcək. 2027-ci ildə UEFA Super Kubokuna Amsterdam, 2028-ci ildə isə Astana ev sahibliyi edəcək.