Rusiya Ermənistandan gətirilən 70 min şüşə suyu satışdan çıxardı – ÖZƏL

Olaylar.az xəbər verir ki, Ermənistanda istehsal olunmuş 70 mindən çox şüşə içməli su və sərinləşdirici içkinin Rusiyada satışı dayandırılıb. Məhsulların satışdan çıxarılmasına "Çestnıy znak" rəqəmsal markalanma sistemi vasitəsilə təhlükəsizlik və keyfiyyət standartlarının pozulmasının aşkarlanması səbəb olub. Dövlət sisteminin operatoru olan İnkişaf Etməkdə Olan Texnologiyalar Mərkəzindən bildirilib ki, bu addım Rospotrebnadzorun tapşırığı ilə istehlakçıların həyat və sağlamlığının qorunması məqsədilə atılıb.

Məhdudiyyətlər Ermənistanın bir neçə tanınmış istehsalçısına aid müəyyən məhsul partiyalarını əhatə edib. Bunların arasında "RRR Mineral Sular Zavodu"nun istehsalı olan "BJNI" müalicəvi-süfrə mineral suları, "Waterlock" şirkətinin "Prosto Azbuka" təbii içməli və uşaq suları, həmçinin "Arsen ev Nerses" firmasına məxsus "DARBAS" brendli "Moxito" qazlı içkiləri yer alır. Qurumdan xüsusilə vurğulanıb ki, qadağa sözügedən brendlərin bütün məhsullarına deyil, yalnız konkret tarixlərdə buraxılmış xüsusi partiyalara şamil olunur.

Hazırda həmin partiyaların həm pərakəndə satış nöqtələrində, həm də onlayn platformalarda realizasiyası yoxlamalar yekunlaşana qədər tam bloklanıb. Mərkəzin nümayəndələrinin sözlərinə görə, markalanma sisteminin ölkədəki bütün kassalara inteqrasiya olunması standartlara cavab verməyən məhsulların anında satışdan çıxarılmasına imkan verir. Qeyd olunub ki, 2026-cı ilin əvvəlindən bəri bu sistem vasitəsilə yararlılıq müddəti keçmiş və ya tələbləri pozan ümumilikdə 48 milyon şüşə suyun satışı əngəllənib.