Rusiyada yanacaq böhranı böyüyür: Novorossiyskdə də sərbəst benzin satışı tamamilə dayandırıldı

Ukrayna dronlarının Rusiyanın neft emalı zavodlarına (NEZ) endirdiyi dağıdıcı zərbələrdən sonra ölkə miqyasında baş qaldıran kəskin yanacaq defisiti və böhranı daha bir mühüm regiona sıçrayıb. Rusiyanın Qara dəniz sahilindəki ən böyük strateji liman şəhərlərindən biri olan Novorossiyskdə yanacaqdoldurma məntəqələrində (YDM) benzinin sərbəst və nağd satışı rəsmən tamamilə dayandırılıb.

Musavat.com xəbər verir ki, Novorossiysk Şəhər Bələdiyyə İdarəetmə Mərkəzi (MÇU) yaranmış kəskin yanacaq qıtlığı ilə bağlı yerli sakinlərə təcili və rəsmi xəbərdarlıq müraciəti ünvanlayıb. Rəsmi bəyanatda şəhərdə daxili yanacaq tədarükünün kritik həddə çatdığı etiraf edilərək bildirilib: "Hörmətli Novorossiysk sakinləri, hazırda şəhərin yanacaqdoldurma məntəqələrində sərbəst satış üçün benzin yoxdur və tamamilə tükənib. Avtomobillərin yanacaqla təmin edilməsi hazırda yalnız əvvəlcədən xüsusi icazə ilə verilmiş məhdud sayda chr("39")yanacaq kartlarıchr("39") vasitəsilə həyata keçirilir".

Yerli mənbələrin məlumatına görə, tətbiq edilən bu qəfil qadağa şəhərdə nəqliyyatın hərəkətində ciddi problemlərə yol açıb və strateji xidmət sahələrindən başqa sıravi vətəndaşların şəxsi avtomobillərini idarə etməsi faktiki olaraq qeyri-mümkün hala gəlib. İqtisadi və hərbi ekspertlər ölkənin ən mühüm ixrac limanlarından sayılan Novorossiyskdə benzinin talona bənzər xüsusi kart sisteminə keçməsini, Rusiyanın neft sənayesində və logistika zəncirində yaranan genişmiqyaslı çökmənin növbəti bariz və təhlükəli göstəricisi kimi qiymətləndirirlər.