Ermənistan XİN: Aİ ilə rüsumsuz ticarət Aİİ üzvlüyünə zidd deyil – ÖZƏL

Olaylar.az xəbər verir ki, Ermənistan xarici işlər nazirinin müavini Vahan Kostanyan ölkəsinin Avropa İttifaqı (Aİ) ilə rüsumsuz ixrac sahəsində əməkdaşlığının Avrasiya İqtisadi İttifaqı (Aİİ) çərçivəsindəki öhdəliklərinə zidd olmadığını bəyan edib. O, əvvəllər tətbiq olunmuş "GSP+" sistemini nümunə gətirərək, Aİ ilə iqtisadi əlaqələrin genişləndirilməsinin Aİİ-dən imtina mənasına gəlmədiyini vurğulayıb. Rusiya tərəfi isə Ermənistanın Aİ-yə inteqrasiya cəhdlərini suveren hüquq kimi tanısa da, bunun Aİİ ölkələrinin maliyyəsi hesabına baş verməməli olduğunu bildirib. Rusiya rəsmiləri İrəvanın Aİ standartlarına keçidinin ittifaq üçün təhdidlər yarada biləcəyini və Ermənistanın Aİİ-dən çıxacağı təqdirdə ÜDM-nin 14%-ni, eləcə də ticarət dövriyyəsinin təxminən 40%-ni itirəcəyini qeyd ediblər. Rusiya Prezidenti Vladimir Putin və Aİİ-nin Astanadakı sammitində digər liderlər Ermənistana ittifaqda qalmaq və ya Aİ-yə üzv olmaq barədə tezliklə referendum keçirməyi təklif etsələr də, Baş nazir Nikol Paşinyan ölkəsinin Aİİ-nin tamhüquqlu üzvü olaraq qaldığını və referendumun yalnız "obyektiv ehtiyac" yaranacağı təqdirdə mümkün olacağını bildirib.