Liparit Drmeyan: “Hakim partiya seçki xərclərini və qanunsuzluqlarını gizlədib” ÖZƏL

Olaylar.az xəbər verir ki, "Birlik Qanadları" partiyasının nümayəndəsi Liparit Drmeyan Konstitusiya Məhkəməsindəki yekun çıxışında 7 iyun parlament seçkilərinin azad və bərabər şəraitdə keçirilmədiyini bəyan edib. O, hakim "Vətəndaş Müqaviləsi" partiyasının seçki kampaniyası dövründə çoxsaylı qanun pozuntularına yol verdiyini, qərargah icarəsi fəndləri ilə gizli xərclərini ört-basdır etdiyini və seçki fondunu qanunsuz aşdığını bildirib. 

Drmeyanın hesablamalarına görə, hakim partiya 588 seçki qərargahındakı işçilərin maaş və vergilərini gizlədərək ən azı 58,8 milyon dramlıq vəsaiti bəyan etməyib. Hüquqşünas, həmçinin Nikol Paşinyanın təbliğat maşınlarının qanunsuz reklam lövhələri ilə polis müşayiətində gəzdiyini, Daxili İşlər Nazirliyinin isə bu barədə şikayətlərə "şəxsi məlumat" bəhanəsi ilə cavab vermədiyini vurğulayıb. 

Drmeyan Baş nazirin seçiciləri "müxalifət gəlsə, müharibə olacaq" bəyanatları ilə qorxudaraq iradələrinə təsir etdiyini və səslərin sayılmasında ciddi manipulyasiyalar olunduğunu qeyd edib.