Ukrayna iki aydır itirdiyindən daha çox ərazi azad edir – ÖZƏL

Olaylar.az xəbər verir ki, Ukrayna ordusu may ayında rus qoşunlarının işğal etdiyindən daha böyük bir ərazini nəzarətə qaytarıb və bu, ardıcıl ikinci aydır ki, belə davam edir. AFP agentliyinin ABŞ-nin Müharibə Araşdırmaları İnstitutunun (ISW) məlumatlarına əsasən apardığı təhlilə görə, may ayında Kiyevin nəzarətindəki ərazi 282 kvadratkilometr, apreldə isə 120 kvadratkilometr artıb. Bu dəyişikliklər cəbhədə mühüm tendensiyadan xəbər versə də, ümumi mənzərə hələlik kəskin dəyişməyib: Rusiya son iki ayda işğal etdiyi torpaqların cəmi 0,4%-ni itirib və hazırda Ukraynanın beynəlxalq səviyyədə tanınmış ərazilərinin (Krım və 2014-cü ildə tutulmuş Donbas hissələri daxil olmaqla) 19%-dən çoxunu əlində saxlayır.

ISW-nin foto, video və tərəflərin bəyanatlarına əsaslanan hesabatına görə, Rusiya bəzi istiqamətlərdə çox ləng də olsa irəliləyişini davam etdirir. Bununla belə, Ukrayna ordusu xüsusilə Donetsk və Zaporojye vilayətlərində rəqibi geri çəkilməyə məcbur edib. Ekspertlər qeyd edirlər ki, cəbhədə böyük ərazilər hələ də boz zona olaraq qalır və Rusiyanın kiçik qruplarla sızma taktikası səbəbindən Ukraynanın nəzarətində olan bəzi mövqelərdə belə hələ də rus hərbçilərinə rast gəlinir.