ABŞ maliyyə ixtisarları Cenevrədəki beynəlxalq təşkilatlarda böhran yaradıb- ÖZƏL

ABŞ prezidenti Donald Tramp administrasiyasının maliyyə dəstəyini azaltmasından sonra Cenevrədə fəaliyyət göstərən beynəlxalq təşkilatlarda vəziyyətin "son dərəcə toksik" hala gəldiyi bildirilib. Olaylar.az xəbər verir ki, bu barədə Avropanın Politico nəşri məlumat yayıb.
Məlumata görə, Vaşinqtonun BMT strukturlarında iştirakını azaltması və beynəlxalq təşkilatların maliyyələşməsini kəsməsi nəticəsində Cenevrədə yerləşən onlarla BMT agentliyi və qeyri-hökumət təşkilatında genişmiqyaslı ixtisarlar başlayıb.
International Organization for Migration-nın keçmiş əməkdaşı Emili Siu nəşrə açıqlamasında bildirib ki, BMT qurumlarında iş mühiti "olduqca gərgin və toksikdir". Onun sözlərinə görə, əməkdaşlar növbəti ay işlərini qoruyub-qoruyamayacaqlarını bilmirlər və kollektivlər daxilində rəqabət və qarşıdurmalar artıb.
Nəşr qeyd edir ki, World Health Organization Cenevrədə 800-dən çox iş yerini ixtisar etməyi planlaşdırır. UNICEF əməkdaşlarının bir hissəsini Romaya köçürür, UNAIDS isə İsveçrə şəhərindəki işçi sayını altı dəfədən çox azaldıb.
Məqalədə vurğulanır ki, beynəlxalq təşkilatların fəaliyyətinin zəifləməsi Cenevrə iqtisadiyyatı üçün də ciddi risk yaradır. Belə ki, diplomatik sektor şəhərin ümumi daxili məhsulunun 11 faizindən çoxunu təmin edir.