"Hökumət Cenevrə danışıqlarının taleyi ilə bağlı suallara cavab verməlidir" – ÖZƏL

Olaylar.az xəbər verir ki, Gürcüstanın "Qaxariya Gürcüstan naminə" müxalifət partiyası Rusiya Xarici İşlər Nazirliyinin sözçüsü Mariya Zaxarovanın Cenevrə müzakirələrinin "neytral əraziyə" köçürülməsi ilə bağlı konfidensial iş aparıldığına dair bəyanatından sonra ölkənin Xarici İşlər Nazirliyindən təcili izahat tələb edib. 

Partiyanın bəyanatında qeyd olunur ki, Gürcüstan tərəfi aylardır "İnsidentlərin Qarşısının Alınması və Onlara Reaksiya Mexanizmi" (IPRM) və Cenevrə formatı çərçivəsində keçirilən görüşlərin məzmununu gizlədir, bu barədə məlumatlar isə yalnız Rusiya mənbələri tərəfindən yayılır. Müxalifət hesab edir ki, formatın beynəlxalq vasitəçilərin (ATƏT, BMT, Aİ və ABŞ) iştirak etmədiyi bir "neytral məkana" daşınması bu formatın faktiki ləğvi və Gürcüstanın suverenliyinin qorumasız qalması deməkdir. 

Bəyanatda həmçinin "Gürcü Arzusu" hökuməti milli maraqlara zərbə vurmaqda və Rusiyanın işğalçı siyasətinə uyğun hərəkət etməkdə ittiham olunaraq, rəsmi Tiflisin bu məxfi danışıqlarda iştirak edib-etmədiyinə dair aydın cavab verməsi tələb edilir.