Orban: Aİ-nin yeni büdcəsi Ukraynanın üzvlüyünə yönəlib – ÖZƏL

Olaylar.az xəbər verir ki, Macarıstanın Baş naziri Viktor Orban bildirib ki, Avropa İttifaqının (Aİ) 2028-2034-cü illəri əhatə edən büdcə təklifi qəbul olunmayacaq, çünki Avropa Komissiyası (AK) bu sənədi yalnız Ukraynanın Aİ-yə üzvlüyünü təmin etmək üçün hazırlayıb.

Orbanın sözlərinə görə, Brüsselin təklif etdiyi bu büdcənin əsas məqsədi Ukraynanı Aİ-yə daxil etmək və bunun üçün maliyyə ayırmaqdır. O, qeyd edib ki, bu büdcə Aİ-ni parçalaya bilər və bir çox ölkələr bu təklifi dəstəkləməyəcək.

Orban əlavə edib ki, sənəddəki maliyyənin azı 20%-i Ukrayna üçün nəzərdə tutulub. Onun fikrincə, büdcə sanki Ukrayna artıq Aİ üzvüdür kimi hazırlanıb və bu, doğru yanaşma deyil.

Avropa Komissiyası iyulun 16-da 2 trilyon avroluq büdcə təqdim edib və bunun 100 milyard avrosunun (ümumi büdcənin 5%-i) Ukrayna üçün ayrılması nəzərdə tutulur. Orban iddia edir ki, digər maddələr altında da Ukraynaya sürətli üzvlük prosesinə görə əlavə xərclər planlaşdırılıb.

Brüssel bu məqsədlə kredit götürülməsini də təklif edir ki, bu da bəzi ölkələrin maraqlarına ziddir. Orban bu büdcəni "ümidsizlik büdcəsi" adlandıraraq, onun nə məqsədə xidmət etdiyinin aydın olmadığını vurğulayıb.