Tramp Qətər rəsmiləri ilə Qəzza atəşkəsini müzakirə edəcək – ÖZƏL

Olaylar.az xəbər verir ki, ABŞ Prezidenti Donald Tramp çərşənbə günü Qətərin baş naziri və xarici işlər naziri Şeyx Mühəmməd bin Əbdülrəhman Al Tani ilə görüşəcək. Görüş zamanı Qəzza zolağında atəşkəs danışıqlarının gedişi və HƏMAS tərəfindən saxlanılan israilli girovların azad edilməsi məsələləri müzakirə olunacaq. 

Bundan əvvəl Tramp bazar ertəsi Qətər əmiri Şeyx Təmim bin Həmad Al Tani ilə telefon danışığı aparmışdı. Mənbənin bildirdiyinə görə, Tramp və Qətərin baş naziri görüşdə həmçinin ABŞ ilə İran arasında nüvə proqramı ilə bağlı yeni razılaşma məqsədilə birbaşa danışıqların bərpası imkanlarını da müzakirə edəcəklər.

Qətər İsrail ilə HƏMAS arasında vasitəçilik edən əsas ölkələrdən biridir. 6 iyul tarixində Qətər, Misir və ABŞ-nin vasitəçiliyi ilə Doha şəhərində tərəflər arasında Qəzzada atəşkəs və girovların azad olunmasına dair danışıqlar bərpa olunub. Qətər Xarici İşlər Nazirliyinin nümayəndəsinə görə, hazırda proses ilkin mərhələdədir və vasitəçilər HƏMAS və İsraillə ayrı-ayrılıqda işləyərək çərçivə razılaşmasının hazırlanmasına çalışırlar. Bu razılaşma gələcəkdə yeni mərhələdə dolayı danışıqlara keçidə şərait yaradacaq.