Ukrayna: Rus dronlarında Çin istehsalı detallar aşkarlanıb – ÖZƏL

Olaylar.az xəbər verir ki, Ukraynanın xarici işlər nazirinin müavini Andrey Sibiga Rusiyanın Ukraynaya qarşı həyata keçirdiyi son genişmiqyaslı hava hücumlarından sonra Çin istehsalı komponentlərin istifadə olunduğunu açıqlayıb. O bildirib ki, Kiyevdə vurulmuş "Şahed-136" və ya "Geran-2" tipli Rusiya-İran istehsalı olan kamikadze dronlarda yeni təchiz olunmuş Çin istehsalı detallar aşkarlanıb.

Nazir müavini əlavə edib ki, bu hadisədən cəmi bir gün əvvəl isə Rusiyanın Odessa şəhərinə raket zərbələri nəticəsində Çinin Baş Konsulluğunun binası az da olsa zərər görüb.

"Putin müharibəni və terroru daha da dərinləşdirir, bu prosesə Şimali Koreya əsgərlərini, İran silahlarını və bəzi Çin istehsalçılarını cəlb edir. Avropa, Yaxın Şərq və İndo-Sakit okean regionunda təhlükəsizlik bir-biri ilə sıx bağlıdır. ABŞ-ni və beynəlxalq ictimaiyyəti Moskvadakı rejimə, onun hərbi büdcəsinə və Rusiyanın müharibəsini dəstəkləyən hər kəsə qarşı təzyiqləri artırmağa çağırırıq", - deyə Sibiga vurğulayıb.