Erməni deputat hökuməti antierməni və protürk maraqlara xidmət etməkdə ittiham etdi – ÖZƏL

Olaylar.az xəbər verir ki, "Ermənistan" fraksiyasının deputatı Levon Koçaryan jurnalistlərə açıqlamasında bildirib ki, ölkədə baş verən son hadisələr - əvvəlcə kilsəyə qarşı aparılan kampaniya, daha sonra Baş nazir Nikol Paşinyanın Türkiyəyə səfəri - bir-biri ilə əlaqəli proseslərin tərkib hissəsidir. Onun sözlərinə görə, bu hadisələr ətrafında müxtəlif fikirlər, analizlər və ehtimallar var və səfər zamanı nələrin razılaşdırıldığına dair qeyri-müəyyənlik mövcuddur.

Koçaryan əlavə edib ki, hazırda "koridor" məsələsi və ABŞ-nin planı ətrafında da müzakirələr gedir, Birləşmiş Ərəb Əmirliklərində görüşün keçirilməsi ilə bağlı danışılır: "Bunlar hamısı bir zəncirin halqalarıdır - məqsəd müxalifəti və antierməni, protürk-azərbaycan maraqlarına qarşı çıxan mərkəzləri nüfuzdan salmaqdır."

Deputat, həmçinin, bu gün keçiriləcək Samvel Karapetyanın müdafiəsinə həsr olunmuş yürüşdə iştirak edib-etməyəcəyi və arxiyepiskop Mikaelin saxlanılması cəhdləri zamanı niyə az sayda müxalifətçinin iştirak etməsi ilə bağlı suallara cavab verərək bildirib: "Əvvəla, məlumatınız yanlışdır - mən ora gedə bilən kimi çatdım və orada azı dörd-beş deputatımız var idi. Bugünkü yürüş təkcə Karapetyanla bağlı deyil, ümumilikdə qanunsuzluğa və siyasi təqibə qarşıdır. Bu proseslər o qədər açıq qanunsuzdur ki, artıq gizlətmək və ya başqa cür təqdim etmək mümkün deyil. Biz mütləq iştirak etməliyik və bu halın qəbuledilməz olduğunu göstərməliyik."