İsrail Avropadan İrana qarşı bütün sanksiyaların bərpasını tələb etdi- ÖZƏL

İsrailin xarici işlər naziri Gideon Saar Avropa ölkələrini - xüsusilə "Avropa üçlüyü" adlandırılan Böyük Britaniya, Almaniya və Fransanı - İrana qarşı bütün sanksiyaları dərhal bərpa etməyə çağırıb. Bu çağırış İranın Beynəlxalq Atom Enerjisi Agentliyi (MAQATE) ilə əməkdaşlığı dayandırmaq qərarından sonra səsləndirilib.
Olaylar.az xəbər verir ki,  o, "İndi BMT Təhlükəsizlik Şurasının sanksiyalarını avtomatik qaydada bərpa edən 'snapback' mexanizmini işə salmağın vaxtıdır. Almaniya, Fransa və Birləşmiş Krallığı bu sanksiyaları tam şəkildə bərpa etməyə çağırıram", - deyə Saar "X" sosial platformasında bildirib.
İsrailin xarici siyasət idarəsinin rəhbəri Tehranın bu qərarını "biabırçı" adlandırıb və bunun İranın nüvə sahəsində beynəlxalq öhdəliklərindən tam imtinası olduğunu deyib: "Beynəlxalq ictimaiyyət dərhal qəti addımlar atmalı, İranın nüvə ambisiyalarını dayandırmaq üçün bütün imkanlardan istifadə etməlidir".
Xatırladaq ki, çərşənbə günü İran Prezidenti Məsud Pezeşkian Tehranla MAQATE arasında əməkdaşlığın dayandırılması barədə qanunu imzalayıb. İran dövlət televiziyasının yaydığı məlumata görə, sənəd prezident tərəfindən imzalandığı andan qüvvəyə minib və icrası məcburidir.