İran: “ABŞ İsrailə hava zərbələrini dayandırmağı tapşırsa,…” – ÖZƏL

Olaylar.az xəbər verir ki, İranın xarici işlər naziri Abbas Əraqçi NBC News-a verdiyi müsahibədə bildirib ki, Tehranla Vaşinqton arasında danışıqların yenidən başlaması üçün ABŞ-nin sadəcə İsraildən İrana qarşı hava zərbələrini dayandırmasını tələb etməsi kifayətdir.

"Düşünürəm ki, əgər amerikalılar diplomatiyaya qayıtmaqda ciddi olsalar, Vaşinqtondan Təl-Əvivə bir telefon zəngi ilə hər şeyi dayandıra bilərlər. Onlar bu prosesi tez bir zamanda dayandıra bilərlər və o zaman biz diplomatiyanı yenidən nəzərdən keçirərik," - deyə Əraqçi vurğulayıb.

Nazir həmçinin ABŞ-nin xüsusi nümayəndəsi Stiv Vitkofa uranın zənginləşdirilməsindən imtina etməyəcəklərini açıq şəkildə bildirdiyini qeyd edib: "Mən ona dəfələrlə demişəm ki, uranın sıfır səviyyəsində zənginləşdirilməsi mümkün deyil. İndi aramızda etimadsızlıq var, çünki o, verdiyi vədləri yerinə yetirməyib."

Əraqçinin sözlərinə görə, o və Vitkof arasında təmaslar davam edir, lakin bu, danışıqların başlanması demək deyil: "Onlar bizdən danışıqlar aparmağımızı xahiş etdilər, amma biz yalnız o zaman danışıqlar aparırıq ki, bu, həqiqətən də danışıqlardır, diktə deyil."