Aİ: Çin Rusiyaya dəstəyini dayandırmalıdır – ÖZƏL

Bu həftə Avropa İttifaqı liderləri Asiyaya səfər edərək əsas bir mesaj verdilər: "Çin və Rusiyadan qaynaqlanan təhdidlərə qarşı qaydalara əsaslanan dünya nizamını qorumaq üçün daha sıx əməkdaşlıq vacibdir."

Olaylar.az xəbər verir ki, Bloomberg agentliyinin məlumatına görə, Avropa İttifaqının xarici siyasət rəhbəri Kaya Kallas və Fransa Prezidenti Emmanuel Makron son günlər Cənub-Şərqi Asiyada keçirdikləri çıxışlarda Ukraynada davam edən müharibə ilə Rusiya-Çin münasibətlərinin dərinləşməsi arasında birbaşa əlaqə olduğunu vurğulayıblar.

Kallas şənbə günü Sinqapurda keçirilən Şanqri-La təhlükəsizlik konfransında çıxışı zamanı bildirib: "Bu, dövrümüzün ən böyük çağırışıdır." O, Çini Ukraynada istifadə edilə biləcək ikili təyinatlı malları Rusiyaya ixrac etməkdə günahlandırıb və bu malların 80%-nin Çindən gəldiyini deyib.

Prezident Makron isə Çini xəbərdar edərək bildirib ki, Şimali Koreyanın Rusiyaya hərbi dəstək verməsi qlobal nəticələrə səbəb ola bilər. "Əgər Çin NATO-nun Asiyada fəal olmasını istəmirsə, Şimali Koreyanın Avropa ərazisində hərbi fəaliyyətlərinin qarşısını almalıdır," - deyə Makron bildirib.

Avropa və Asiya rəsmiləri həmçinin kibertəhlükələr, sabotaj halları, sualtı infrastruktur riskləri və "kölgə donanmalarının" fəaliyyəti ilə bağlı narahatlıqlarını dilə gətiriblər.

Qərb ölkələri Çini Rusiyaya pilotsuz uçuş aparatları və kritik texnologiyalar verməkdə birbaşa ittiham edib. Sammitdə, eyni zamanda, 2019-cu ildən bəri ilk dəfə olaraq Çin müdafiə nazirinin iştirak etməməsi də diqqət çəkib.