ABŞ müdafiə naziri: “Çin təhlükəsi realdır, biz birlikdəyik” – ÖZƏL

Olaylar.az xəbər verir ki, ABŞ-nin müdafiə naziri Pit Hegset şənbə günü Sinqapurda keçirilən "Şanqri-La Dialoqu" adlı təhlükəsizlik konfransında çıxış edərək, Hind-Sakit okean regionundakı müttəfiqləri Çinin artan hərbi və iqtisadi təzyiqləri qarşısında tək qalmayacaqlarına əmin edib. O, bununla yanaşı, həmin ölkələrin öz müdafiələrinə daha çox töhfə vermələrinin vacibliyini vurğulayıb.

Nazir bildirib ki, ABŞ xaricdəki müdafiəsini gücləndirəcək və bu addım Pentaqonun "Pekindən qaynaqlanan sürətlə artan təhdidlər" kimi qiymətləndirdiyi vəziyyətə qarşı yönəlib. Hegset xüsusilə Çinin Tayvana qarşı aqressiv mövqeyini qeyd edərək deyib: "Çin ordusu real hərbi əməliyyatlara hazırlaşır. Biz vəziyyəti gözəlləşdirməyəcəyik - Çindən qaynaqlanan təhdid realdır və bu, qaçılmaz ola bilər".

Çıxışı zamanı Hegset vurğulayıb ki, Çin sadəcə Tayvanı ələ keçirmək üçün hərbi gücünü artırmır, eyni zamanda bu məqsədlə gündəlik aktiv hazırlıqlar görür.

ABŞ müdafiə naziri həmçinin Çinin Latın Amerikasındakı ambisiyalarını, o cümlədən Panama kanalındakı təsirini artırmaq cəhdlərini də sərt tənqid edib. O, region ölkələrini öz hərbi büdcələrini artırmağa çağıraraq, Avropa ölkələrinin hazırda ÜDM-lərinin 5%-ni müdafiəyə ayırmaq məcburiyyətində qaldıqlarını xatırladıb: "Hamımız töhfə verməliyik", - deyə Hegset bildirib.