Danimarka 40 illik atom enerjisi qadağasını ləğv etməyi nəzərdən keçirir- ÖZƏL

Danimarka hökuməti 40 ildir qüvvədə olan atom enerjisi qadağasının ləğv olunmasını araşdırmağa hazırlaşır. Olaylar.az xəbər verir ki, bu barədə Danimarkanın İqlim, Enerji və Kommunal Xidmətlər naziri Lars Aagaard "Politiken" qəzetinə müsahibəsində bildirib.
Nazirin sözlərinə görə, aparılacaq araşdırma atom enerjisinin Danimarkanın hazırkı enerji istehsalına - əsasən külək və günəş enerjisinə - əlavə kimi potensialını və risklərini qiymətləndirəcək. Bu araşdırmanın təxminən bir il davam edəcəyi gözlənilir.
"Sağ partiyalar atom enerjisinə elə yanaşırlar ki, guya bu, heç bir çətinlik yaratmayan, hazır tətbiq oluna bilən bir həll yoludur," - mərkəzçi Mövqe Partiyasından olan Aagaard qeyd edib.
Danimarkada 1985-ci ildən bəri atom enerjisindən istifadə qadağandır. Bu qanunlar onun ölkənin enerji planlamasında və elektrik şəbəkəsinə qoşulmasında istifadəsinə icazə vermir. Lakin son illərdə bu məsələyə yanaşma dəyişməkdədir. Keçmişdəki radioaktiv fəlakət qorxuları yerini indi texnologiyanın dəyəri, tətbiq sürəti və mövcud infrastrukturla uyğunluğu kimi məsələlərə verib.
Hökumətin ən böyük partiyası olan Sosial Demokratlar ötən həftə atom enerjisinin mümkünlüyünün dərindən araşdırılmasını istədiklərini bəyan ediblər. Bu mövqe Baş nazir Mette Frederiksenin də məsələni "açıq fikirlə" dəyərləndirmək lazım olduğunu deməsindən sonra səsləndirilib. Frederiksen əvvəllər bu məsələyə skeptik yanaşırdı.
Müxalifətdə olan Liberal İttifaq Partiyası uzun müddətdir atom enerjisinə qoyulan qadağanın aradan qaldırılmasını və bu enerjinin ciddi şəkildə nəzərdən keçirilməsini müdafiə edir.
Nazir Aagaard bildirib ki, yeni analiz tullantıların idarə olunması, yanacaq mənbələri və təhlükəsizlik standartları kimi mühüm məsələləri də əhatə edəcək. "Bu suallar cavablandırılmadan qadağanın ləğvi istiqamətində ciddi addım atmaq mümkün deyil," - deyə o vurğulayıb.