Paşinyan cütlüyünün Sünik səfərləri seçkiqabağı təşviqat kimi qiymətləndirilir - ÖZƏL

Olaylar.az xəbər verir:
13 may 2025-ci il tarixində yayılan məlumata görə, Ermənistanın baş naziri Nikol Paşinyan və həyat yoldaşı Anna Akopyan son bir ayda "Təhsil - dəbdədir" təşəbbüsü çərçivəsində ikinci dəfə Sünik bölgəsinə səfər ediblər. Rəsmi olaraq qeyri-siyasi xarakter daşıdığı iddia edilən bu təşəbbüsün əslində seçkiqabağı kampaniyanın bir hissəsi olduğu vurğulanır. Layihənin ilkin təşəbbüskarı Anna Akopyan olsa da, daha sonra Nikol Paşinyan da prosesə qoşularaq demək olar ki, bütün görüşlərdə iştirak edib.
10 mayda Kapan şəhərində, 11 mayda isə Kadjaranda keçirilən görüşlərdə Paşinyan cütlüyü ictimaiyyətlə görüşüb. Kapan şəhərində zal tam dolu olsa da, Kadjarandakı görüşdə iştirakçılar azlıq təşkil edib və eyni şəxslərin bir neçə dəfə təkrarlandığı müşahidə olunub. Bildirilir ki, bəzi iştirakçılar əvvəlki görüşdən "köçəri şəkildə" Kadjarana gətirilib.
Həmçinin Zəngəzur Mis-Molibden Kombinatının işçilərinin rəhbərlik tərəfindən tədbirdə iştirak etməyə məcbur edildiyi iddia olunur. Görüşlərdə son etiraz aksiyalarında iştirak edənlər və Yerevan Dövlət Universitetinin Geologiya və Coğrafiya fakültəsinin dekanı Sarkis Kelyan da yer alıb. Qeyd edilir ki, Kelyan Akopyanı universitetdə qəbul edən yeganə dekan olub.