Viktor Orban: “Sanksiyalar Macarıstan iqtisadiyyatını məhv edəcək”- ÖZƏL

Olaylar.az xəbər verir ki, Macarıstanın Baş naziri Viktor Orban Avropa İttifaqı ölkələrinin parlament sədrlərinin Budapeştdə keçirilən konfransında çıxış edərək, Rusiyaya qarşı iqtisadi sanksiyaların tezliklə ləğv edilməsinin vacibliyini vurğulayıb. O, Avropa Komissiyasının Rusiya enerji daşıyıcılarının idxalını qadağan etmə planını dəstəkləmədiklərini bildirib.
Orban bildirib ki, Brüsselin bu təşəbbüsü neft, qaz və elektrik enerjisinin qiymətlərinin artmasına, bunun isə Macarıstan iqtisadiyyatını "sadəcə məhv etməsinə" gətirib çıxaracaq: "Təsəvvür edin ki, ev təsərrüfatları və şirkətlər üçün enerji daşıyıcılarının qiyməti ikiqat artacaq. Macar ailələri bunu qaldıra bilməz."
Baş nazir əlavə edib ki, bu səbəbdən Macarıstan Ukrayna münaqişəsinin tezliklə həllini və Brüsselin tətbiq etdiyi iqtisadi sanksiyalardan imtinanı istəyir: "Macarlar sülh istəyir və sanksiyalar siyasətindən tezliklə qurtulmaq arzusundadırlar."
Macar hökuməti daha əvvəl bəyan etmişdi ki, Avropa Komissiyasının Rusiyadan enerji idxalını yaxın illərdə tamamilə dayandırmaq planı ölkəyə hər il 2 milyard avroya qədər əlavə xərc gətirə bilər.
Orban konfrans zamanı həmçinin qeyd edib ki, Ukraynanın Avropa İttifaqına vaxtından əvvəl üzv olması bütün üzv dövlətləri Rusiya ilə qarşıdurmaya sürükləyə bilər.