Ukrayna münaqişəsi ABŞ-ı Asiyada Çinə qarşı fəaliyyətindən yayındırır– ÖZƏL

Ukraynadakı münaqişə ABŞ-ın diqqətini Asiya-Sakit okean regionundan yayındırır və bu, Çinə öz maraqlarını bölgədə daha fəal şəkildə irəli sürmək imkanı yaradır. Olaylar.az xəbər verir ki, bu barədə South China Morning Post (SCMP) qəzeti yazıb.

Nəşrdə qeyd olunur ki, mövcud vəziyyətdə Moskva uduzmur, əksinə, Pekin strateji baxımdan üstünlük əldə edir. Müəlliflərin fikrincə, Ukraynada gedən hərbi əməliyyatlar Vaşinqtonun diqqətini Hind-Sakit okean regionuna tam cəmləməsinə imkan vermir.

Məqalədə həmçinin vurğulanır ki, Çin Xalq Respublikasının Sədri Si Cinpinin bu yaxınlarda Moskvaya səfəri Rusiya-Çin münasibətlərinin yenidən nəzərdən keçirilmədiyini göstərdi. Müəlliflər hesab edirlər ki, bu, Qərb üçün əlverişli deyil. Qərb Pekindən Rusiyaya Ukrayna münaqişəsi ilə bağlı danışıqlara təzyiq göstərməyi gözləyir.

Xatırladaq ki, ötən ilin noyabrında Si Cinpin bəyan etmişdi ki, Çin Ukrayna ətrafındakı münaqişə ilə bağlı sülh danışıqlarını irəlilətmək üçün vasitəçilik səyləri göstərir, deeskalasiyanı dəstəkləyir və dialoqu təşviq edir.

Bundan əlavə, Polşanın xarici işlər naziri Radoslav Sikorski ABŞ-ın vasitəçilik cəhdləri uğur qazanmazsa, Rusiya-Ukrayna danışıqlarında Türkiyə və ya Çinin vasitəçi kimi iştirakını istisna etməmişdi.