ABŞ-da qeyri-qanuni miqrantları gündəlik 998 dollar cərimə ilə cəzalandırmağı planlaşdırılır- ÖZƏL

ABŞ prezidenti Donald Trampın administrasiyası, deportasiya qərarı verildikdən sonra ölkəni tərk etməyən qeyri-qanuni miqrantları gündəlik 998 dollar cərimə ilə cəzalandırmağı planlaşdırır. Olaylar.az xəbər verir ki, bu barədə Reuters xəbər agentliyinin əldə etdiyi sənədlərə əsasən, bu tədbir, miqrantların özləri tərəfindən CBP Home mobil tətbiqi vasitəsilə dərhal ölkəni tərk etmələrini təmin etmək məqsədini güdür.

ABŞ Daxili Təhlükəsizlik Nazirliyinin sözçüsü Trisha Maklaflin qeyd edib ki, əgər miqrantlar ölkəni könüllü olaraq tərk etməsələr, onlara cərimə tətbiq ediləcək. "Əgər onlar buna əməl etməsələr, nəticələr gözləyir. Bu, deportasiya qərarının icrasını ləngidən hər bir qeyri-qanuni miqrant üçün gündəlik 998 dollar cəriməni əhatə edir", - deyə o bildirib.

Bundan əlavə, ABŞ hökuməti, cərimə ödəməkdən imtina edən miqrantların aktivlərinin müsadirə edilməsini də araşdırır. Reuters-in məlumatına görə, bu cərimələr geriyə dönük olaraq son beş il ərzində tətbiq edilə bilər ki, bu da miqrantlar üçün bir milyondan artıq cərimə ödəmə ilə nəticələnə bilər.

Bu cərimələr 1996-cı il qanunu əsasında tətbiq olunur və ilk dəfə 2018-ci ildə Trampın prezidentliyi dövründə qüvvəyə minib. 2021-ci ildə isə ABŞ prezidenti Co Bayden bu qərarı ləğv etmişdi. Tramp administrasiyası, ABŞ-ın immiqrasiya siyasətini sərtləşdirməyə davam edib və Meksika sərhədində fövqəladə vəziyyət elan edib.