Avropa Komissiyasının rəhbəri ABŞ tariflərinə cavabı müzakirə edir – ÖZƏL

Olaylar.az xəbər verir ki, Avropa Komissiyasının Prezidenti Ursula fon der Leyen, Amerika Birləşmiş Ştatlarının tətbiq etdiyi yeni tariflərə cavab olaraq avtomobil, metallurgiya və əczaçılıq sənayesi nümayəndələri ilə bir sıra görüşlər keçirir. Məqsəd - Brüsselin Vaşinqtonun polad rüsumlarına verəcəyi cavabdan əlavə mümkün ticarət qarşı tədbirlərini müəyyənləşdirməkdir.

Bazar ertəsi Fon der Leyen metallurgiya sənayesi təmsilçiləri ilə onlayn görüş keçirib və günün ikinci yarısında avtomobil sektoru ilə danışıqlar aparıb. Üçüncü görüş - əczaçılıq sənayesi ilə - sabah, çərşənbə axşamına təyin edilib.

Fon der Leyenin dəvət məktubunda bildirilir ki, Avropa Birliyi 1 iyul 2026-cı ildən qüvvəyə minəcək yeni ticarət tədbiri ilə mövcud polad müdafiə mexanizmini əvəzləməyi planlaşdırır. Məqsəd - qlobal istehsal artıqlığının yaratdığı mənfi ticarət təsirlərinə qarşı effektiv müdafiə təmin etməkdir.

Avropa Avtomobil İstehsalçıları Assosiasiyası (ACEA) bildirib ki, görüşdə Amerika Birləşmiş Ştatlarının tariflərinin Avropa Birliyi avtomobil sənayesinə mümkün təsirləri və effektiv cavab mexanizmləri müzakirə olunacaq. ACEA sözçüsünün verdiyi məlumata görə, sənaye nümayəndələri danışıqlar yolu ilə həll axtarışında olduqlarını vurğulayıblar.

Danışıqlarda BMW, Wolkswagen, Stellantis, Scania, Daimler Truck və Bosch kimi nəhəng şirkətlərin rəhbərləri və lobbi qrupları iştirak edirlər.

Keçən həftənin sonunda Avropa Komissiyası böyük əczaçılıq şirkətlərinin rəhbərlərini də görüşə dəvət edib. Mənbələrin məlumatına görə, dəvət yalnız Avropa Birliyinə məxsus firmalarla məhdudlaşmayıb - İsveçrədə yerləşən Novartis və Roche kimi şirkətlər də dəvət olunub. Roche bu barədə şərh verməkdən imtina edib.

Avropa Əczaçılıq Sənayesi və Assosiasiyaları Federasiyası (EFPIA) və Avropa Biotexnologiya Assosiasiyası (Europabio) görüşdə iştiraklarını təsdiqləyiblər. Əldə olunmuş dəvət məktubuna əsasən, əczaçılıq sektoru ilə görüş çərşənbə axşamı, saat 10:30-da (Bakı vaxtı ilə 12:30) baş tutacaq.

Bu görüşlər, dünya bazarlarında təşviş fonunda keçirilir - Trampın elan etdiyi yeni tariflər Asiya və Avropa birjalarında çöküşə, neft qiymətlərinin isə kəskin düşməsinə səbəb olub. İnvestorlar qlobal ticarət müharibəsi və iqtisadi tənəzzül riskindən ehtiyat edirlər.