Rusiya və Fransa prezidentləri görüşəcək

Olaylar.az TASS-a istinadən xəbər verir ki, Rusiya prezidenti Vladimir Putin fevralın 7-də  fransalı həmkarı Emmanuel Makronla görüşəcək.

Bu barədə Kremlin mətbuat katibi Dmitri Peskovun mediaya açıqlamasında bildirilir. 

Məlumata görə,  son iki həftə ərzində üç dəfə telefon danışığı aparan dövlət başçıları Makronun fevralın 7-də Moskvaya səfəri ilə bağlı razılığa gəliblər.

Peskov qeyd edib ki, gündəmdə çoxlu suallar olacaq. Xüsusilə, prezidentlər Rusiya Xarici İşlər Nazirliyinin ötən il dekabrın 17-də açıqladığı təhlükəsizlik zəmanətləri ilə bağlı təkliflərə toxunmağa hazırlaşır. Yanvarın 26-da ABŞ və NATO yazılı cavablarını təqdim ediblər.

Prezidentin sözçüsü həmçinin bildirib ki, Putin liderlərin telefonla başlatdığı müzakirələri davam etdirməyə, Rusiyanın narahatlığını ifadə etməyə, Moskvanın vəziyyətə münasibətini, ABŞ və NATO-nun cavablarına münasibətini ifadə etməyə hazır olacaq. Bundan əlavə,  "Prezidentlər çox güman ki, Rusiya tərəfinin çox vacib hesab etdiyi ikitərəfli əlaqələrə toxunacaqlar"- deyə Peskov bildirib.

Danışıqlardan sonra Putin və Makron Rusiya-Fransa sammitinin nəticələrini müzakirə etmək üçün mətbuat konfransı keçirəcəklər.

Xatırladaq ki,  Fransa prezidenti fevralın 8-də Ukraynaya işgüzar səfər etməyi də planlaşdırır.