Çin-ASEAN hərtərəfli strateji tərəfdaşlığını elan etdi

Olaylar.az xarici KİV-ə istinadən xəbər verir ki, Çin və 10 ölkənin Cənub-Şərqi Asiya Ölkələri Assosiasiyası (ASEAN) hərtərəfli strateji tərəfdaşlıq qurduqlarını bildirib.
Bu barədə Xi Cinping Çin-ASEAN dialoqunun yaradılmasının 30-cu ildönümünə həsr olunmuş sammitin açılış mərasimində söyləyib.
"Bu gün biz, birlikdə Çin-ASEAN Hərtərəfli Strateji Tərəfdaşlığının yaradılmasını elan edirik. Bu, münasibətlərimizin tarixində yeni bir mərhələdir və regionumuzun və dünyanın sülh, sabitlik, firavanlıq və inkişafına yeni təkan verəcək", - deyə Xi Cinping qeyd edib.
Əlavə olaraq Çin ASEAN ölkələrinin COVID-19-a qarşı mübarizəsini və iqtisadiyyatın bərpasını dəstəkləmək üçün növbəti üç il ərzində ASEAN-a daha 1,5 milyard dollarlıq inkişaf yardımı verməyə hazır olduğunu bildirib.
 Çin ASEAN ilə beynəlxalq inkişaf sahəsində əməkdaşlığa və bu sahədə saziş üzrə danışıqlara başlamağa hazırdır .
Çin və ASEAN 1991-ci ildə dialoq əlaqələri qurub. ASEAN 10 Cənub-Şərqi Asiya ölkəsi olan Bruney, Kamboca, İndoneziya, Laos, Malayziya, Myanma, Filippin, Sinqapur, Tayland və Vyetnam arasında iqtisadi, siyasi və təhlükəsizlik sahəsində əməkdaşlığı təşviq edir.