Qəza nəticəsində- 5 nəfər ölüb, daha 40 nəfər yaralanıb

Olaylar.az xarici KİV-ə istinadən xəbər verir ki, ABŞ-ın Viskonsin ştatının Uokeşa şəhərində avtomobilin Milad paradının iştirakçılarını vurması nəticəsində azı 5 nəfər ölüb, daha 40 nəfər yaralanıb.

Bu barədə rəsmi polis idarəsindən məlumat verilib.

"Hazırda beş nəfərin öldüyünü və 40-dan çox insanın yaralandığını təsdiqləyə bilərik. Lakin əlavə məlumat topladıqca bu rəqəmlər dəyişə bilər", - polis idarəsi "Facebook" səhifəsində bildirib.

Hüquq-mühafizə orqanları  əməkdaşlarının sözlərinə görə, zərərçəkənlərin çoxu özlərini xəstəxanalara çatdırıblar. Qəzanın baş verdiyi küçənin yerli vaxtla saat 12:00-a qədər (Moskva vaxtı ilə 21:00) bağlı olacağı qeyd edilir. Bu ərazidəki müəssisələr də bağlı qalacaq. Hadisə ilə bağlı əlavə araşdırma aparılır.

Xatırladaq ki, daha əvvəl hüquq-mühafizə orqanları avtomobilin Milad paradının iştirakçılarının kütləsinə çırpılması barədə məlumat vermişdi. Polis "maraqlanan şəxsi" istintaqa saxlayıb. Bu arada, maşının sürücüsü olub-olmadığını dəqiqləşdirməyiblər.

Yerli Federal Təhqiqatlar Bürosu (FTB) özünün Twitter səhifəsində qeyd edib ki, hüquq-mühafizə partnyorları standart təcrübənin bir hissəsi kimi "yardım göstərirlər".