Ukraynada daha bir DƏHŞƏTLİ HADİSƏ: polis polkovniki girov götürüldü

Ukraynanın Poltava şəhərində Cinayət Axtarış İdarəsinin rəisi, polis polkovniki Vitali Şiyan girov götürülüb.

Qumbara ilə silahlanmış şəxs polkovniki girov götürərək naməlum istiqamətdə aparıb.

Bu barədə ölkənin Daxili İşlər nazirinin müavini Anton Geraşçenko Feysbuk hesabından məlumat yayıb.

Qeyd olunur ki, yerli vaxtla saat 09:05-də avtomobil oğurlamaqda şübhəli bilinən şəxslər inzibati məhkəmənin yaxınlığında saxlanılıb. Qanunu pozan şəxs hüquq-mühafizə orqanı işçisinin əllərindən tutub və əl qumbarası çıxardıb. Danışıqlardan sonra, o, girovu Poltava vilayətinin Cinayət Axtarış İdarəsinin rəisi polkovnik Şiyanla mübadilə edib. O, polkovniklə birlikdə şəhəri tərk etmək üçün maşın tələb edib və hadisə yerindən uzaqlaşıb.

Cinayətkarın idarə etdiyi avtomobil polis maşınları ilə müşayiət olunur.

Xatırladaq ki, bu, son 3 gün ərzində Ukraynada baş verən ikinci girovgötürmə hadisəsidir. Belə ki, 21 iyulda Lutsk şəhərində silahlı şəxs 13 sərnişin ilə dolu avtobusu qaçırmış, yüksək vəzifəli siyasətçilərdən özlərini "qanuni terrorçu" olaraq tanıtdıqları videolar çəkməsini tələb etmişdi.

publika.az