Koreya 19 istiqamət üzrə uçuşları bərpa edir

Cənubi Koreyanın ən iri aviadaşıyıcısı "Korean Air" iyun ayından etibarən beynəlxalq marşrutları bərpa edəcək. Bu barədə şirkətin yaydığı məlumatda bildirilib.

Qeyd edilib ki, koronavirusun yayılma surəti azaldığı üçün hava şirkəti belə qərara gəlib.

1 iyundan başlayaraq "Korean Air" 19 istiqamət, o cümlədən, Vaşinqton, Vankuver, Toronto, Amsterdam, Frankfurt, Sinqapur, Pekin, Kuala-Lumpura uçuşları bərpa etməyi planlaşdırır. Bəzi uçuşlar gündəlik, digərləri həftədə 3-4 dəfə və daha çox yerinə yetiriləcəkdir.

Şirkət Moskva, Sankt-Peterburq, Vladivostok və İrkutska uçuşları hələlik bərpa etməyəcək.

Hazırda, "Korean Air" 13 beynəlxalq marşrut üzrə həftədə 55 uçuş təklif edir, halbuki koronavirus pandemiyasından əvvəl şirkət 110 marşrut üzrə 900-dən çox uçuş həyata keçirmişdi.

Martın sonunda, "Korean Air" əksər ölkələrin sərhədlərini bağladığından və ya giriş məhdudiyyətləri tətbiq olunduğundan beynəlxalq marşrutlardakı uçuşların 90% -dən çoxunu dayandırıb.

azvision.az