2010-cu ildəki təyyarə qəzasında PARTLADICI MADDƏ İZLƏRİ

2010-cu ildə Rusiyanın Smolensk şəhəri yaxınlığında baş verən aviaqəza nəticəsində ölən Polşa prezidenti Lex Kaçinskinin təyyarəsinin qalıqları və cəsədlərdən birinin üzərindən partladıcı maddə izləri aşkarlanıb.

APA-nın "Wiadomosci"-yə istinadən verdiyi xəbərə görə, bu barədə təyyarə qəzası üzrə Polşanın istintaq komissiyasının nümayəndələri bildirib.

"Xüsusi avadanlıqlarla müayinə edilmiş "Ту-154М" təyyarəsinin qalıqlarının xeyli hissəsinin və ən azı bir cəsədin üzərində partladıcı maddə aşkarlanıb", - deyə komissiyanın hazırladığı hesabatda bildirilir.

Komissiya üzvləri qəza yerindən götürülən torpaq nümunələrində partladıcı maddələrin aşkarlanmadığını bildiriblər.

Xatırladaq ki, "Tu-154" təyyarəsi 2010-cu ildə Smolensk havalimanına enişə başlayarkən qəzaya uğrayıb. Nəticədə 88-i sərnişin və 8-i heyət üzvü olmaqla, 96 nəfər ölüb.