“Google” axtarış sisteminin mobil proqramı yerinə yetirilməmiş sorğuları avtomatik icra edəcək

Mobil texnologiyaların yüksək inkişaf səviyyəsinə baxmayaraq, smartfon istifadəçilərinin əksəriyyəti mütəmadi olaraq mobil şəbəkə siqnalının tutmadığı yerlərdə olurlar. Bu zaman istifadəçilər zəng etmək və ya internetdə lazımi informasiyanı axtarmaq imkanından məhrumdurlar. Məsələn, son vaxtlara kimi "Google" axtarış sisteminin mobil proqramı belə vəziyyətdə, sadəcə, qoşulma səhvi haqda məlumat verirdi, istifadəçi isə sorğunu yadda saxlayaraq siqnal peyda olan kimi yenidən axtarış verməli idi.
 "Google"un axtarış sisteminin mobil proqramının "Android" platforması üçün növbəti versiyasında bu çatışmazlıq aradan qaldırılıb. İndi axtarış proqramı internetə qoşulma əlçatmaz olduqda istifadəçi sorğularını yadda saxlayır və siqnal yaranan kimi, həmin sorğuları avtomatik yerinə yetirir.

Bir və ya bir neçə axtarış sorğusunun uğurlu icrası haqda bildiriş smartfonda ekranın yuxarı hissəsində üzə çıxan pəncərə şəklində görsənəcək. Şirkətdən bildirilib ki, axtarış sisteminin mobil versiyasının yeni funksiyası batareyanın sərfiyyatına təsir etmir və axtarışın nəticələrinin yüklənməsi minimum trafik sərf edir.

"ICTnews" Elektron Xəbər Xidməti "hitech.newsru.ru" saytına istinadən yazır.