Bələdiyyə sədrliyinə namizəd Azərbaycan diaspor təşkilatında olub

Kocaeli Büyükşəhər bələdiyyə sədrliyinə CHP-dən olan  namizəd Tahsin Tarhan Seka Parkda yerləşən Kocaeli Azərbaycan Mədəniyyət evində Türkiyə Azərbaycan Dərnəkləri Federasiyasını ziyarət edib. TADEF-dən "OLAYLAR"a verilən xəbərə görə, Türkiyə Azərbaycan Dərnəkləri Federasiyasının rəhbəri Bilal Dündarın ev sahibliyi ilə reallaşan tədbirdə Kocaeli Büyükşəhər bələdiyyə başçılığına namizəd CHP-dən olan sənayeçi və iş adamı Tahsin Tarhan, Kocaəli əyaləti idarə heyətinin üzvü Səlcuq Kurcan və digərləri iştirak ediblər. Tədbiri giriş sözü ilə  açan  Türkiyə Azərbaycan  Dərnəkləri Federasiyasının  başçısı Bilal Dündar Azərbaycan  ərazisinin  iyirmi faizinin  işğal altında olduğunu söyləyib. Bilal Dündar   tezliklə  ədalətin   öz yerini tapacağını bildirib. O,  Ermənistanın işğal etdiyi torpaqlardan  geri çəkilməsini və  ev-eşiklərindən didərgin düşmüş  1 milyondan çox insanın  öz doğma yurdlarına dönməsini arzu etdiklərini tədbir iştirakçılarının diqqətinə çatdırıb. Kocaeli Büyükşəhər bələdiyyə sədrliyinə CHP-dən olan  namizəd Tahsin Tarhan Ulu Öndər "Heydər Əliyev Adına Kitabxananı" gəzərək belə bir kitabxananın yaradılması və eləcə də kitabsevərlərin  istifadəsinə təqdim edilməsinə görə Bilal Dündara təşəkkür edib. Daha sonra "Soyqırımın Səssiz şahidləri" Adlı Soyqırım Muzeyini də gəzən Tahsin  Tarhan Dağlıq Qarabağ və onun ətraf rayonlarının  işğalı, Xocalı soyqırımı və Şərq Anadoluda erməni quldur dəstələrinin  törətdiyi qırğınlarla əlaqədar ətraflı məlumat alıb.