AQSİA təmsilçiləri Rumıniyada konfransda iştirak edib - FOTOLAR

Bu günlərdə Rumıniyanın müxtəlif bölgələrindən yüzlərlə qadın sahibkarın qatıldığı konfrans düzənlənib.  Konfransda Azərbaycanı AQSİA İdarə Heyətinin sədri Səkinə Babayeva, Assosiasiyanın İcraçı katibi Mətanət Ağamirli, "Artmood  Agencyni" şirkətinin  təsisçisi Xəyalə Mütəllimova təmsil ediblər. Rumıniya və Avropa parlamenti deputatlarının qatıldığı toplantıda çıxış edən natiqlər biznesdə  qadınların rolunun daha da gücləndirilməsindən, təcrübə mübadiləsinin əhəmiyyətindən bəhs ediblər.
 Rumıniya Qadın Sahibkarlar Assosiasiyasının təşkilatçılığı ilə keçirilən  konfransda Azərbaycan Qadın Sahibkarlar İnkişafı Assosiasiyasının (AQSİA) İdarə Heyətinin sədri Səkinə Babayeva çıxış edərək iki ölkənin xanım sahibkarları arasında münasibətlərin əhəmiyyətindən danışıb.  AQSİA sədri rəhbərlik etdiyi qurumun fəaliyyətindən söz açaraq qeyd edib ki,  Azərbaycanda qadın sahibkarlığının inkişafı istiqamətində ciddi addımlar atılır. Avropa Parlamentinin deputatı, Rumıniya Qadın Sahibkarlar Assosiasiyasının prezidenti, Yüngül Sənayedə İşəgötürənlər Federasiyasının prezidenti, Milli İxracatçılar Şurasının üzvü Maria Qrapininin moderatorluğu ilə gerçəkləşən konfransda Rumıniya Nümayəndələr Palatasının üzvü, deputat, siyasətçi Elena Stoica, Beynəlxalq Şəxsi Müəssisə Mərkəzi Mütəxəssisi Camelia Bulat da çıxışlarında Azərbaycanla təmasların genişlənməsində maraqlı olduqlarını bildiriblər.  
Məlum olduğu kimi, Birləşmiş Millətlər Təşkilatı Baş Assambleyasının 2015-ci il 25 sentyabr tarixli qətnaməsi ilə 15 il müddətinə insan inkişafı üçün son dərəcə əhəmiyyətli imkanların yaradılmasına, qlobal inkişafın dayanıqlılığının təmin edilməsinə təkan verəcək 17 məqsəd və 169 hədəfdən ibarət "Gündəlik 2030" təsdiq edilib. Müəyyən edilmiş qlobal məqsəd və hədəflərə uyğun olaraq dayanıqlı inkişafın təmin olunması istiqamətində aparılan işlər  dünya ölkələrində  kollektiv tədbirləri özündə əks etdirir. Bu baxımdan Rumıniyada qadınların biznesdə rolunun artırılması ilə bağlı düzənlənən tədbirdə  5-ci məqsəd - "Gender bərabərliyinə nail olmaq, bütün qız və qadınları səlahiyyətləndirmək" ətrafında geniş müzakirələr aparılıb.  Konfransın gündəliyində, həmçinin 
"İnklüziv və dayanıqlı iqtisadi artımı, hamı üçün məşğulluğu və layiqli əməyi təşviq etmək", 
"Dayanıqlı inkişaf üçün qlobal əməkdaşlığı canlandırmaq" bəndləri də yer alıb. Çıxışçılar dayanıqlı inkişafın uğurlu icrası üçün hökumətlə yanaşı  özəl sektorun üzərinə böyük məsuliyyət düşdüyünü vurğulayıblar. 
Daha sonra konfrans iştirakçılarına  rəsmi ziyafət verilib. Səfərin ikinci günü Rumıniya Qadın
 Sahibkarlar Assosiasiyası ilə Azərbaycanda Qadın Sahibkarlığının İnkişafı Assosiasiyası arasında  əməkdaşlığa dair  memorandum imzalanıb.