Halal turizm standartları ölkəmizə nə vəd edir?

Bu, müsəlman ölkələrindən turist axınını sürətləndirəcək

Son zamanlar müsəlman ölkələrindən, eləcə də  Bakıda keçirilən IV İslam Həmrəyliyi Oyunları öncəsi ölkəmizə  çoxsaylı turist axını Azərbaycanda halal turizm standartlarının tətbiqini zəruri edir. Məsələ orasındadır ki, ölkəmiz üçün yeni olan halal turizm standartları cəmiyyətdə birmənalı qarşılanmır. Reallıq isə ondan ibarətdir ki, sözügedən standartlar artıq müsəlman ölkələrində xeyli müddətdir ki, tətbiq olunmaqdadır. Maraqlıdır, halal turizm standartları dedikdə nə nəzərdə tutulur və ölkəmizdə onun tətbiqi hansı səviyyədədir?

Əvvala onu xatrıladaq ki, artıq bu məqsədlə ölkəmizdə halal idarəetmə sistemi müəyyən edilir. Standartlaşdırma, Metrologiya və Patent üzrə Dövlət Komitəsi yanında Standartlaşdırma İnstitutunun baş direktoru vəzifələrini icra edən Namiq Tağıyev ölkənin multikultural dəyərlərini özündə ehtiva edən yeni halal turizm modelinin yaradıldığını bildirib. O, Prezident İlham Əliyevin qeyri-neft sektorunda xüsusi payı olan turizm sənayesinin inkişafına dəstəyini xüsusi vurğulayıb. N.Tağıyev qeyd edib ki, Prezidentin uğurlu siyasəti nəticəsində son illərdə əldə olunmuş dayanıqlı sosial-iqtisadi tərəqqi bu sahənin hərtərəfli inkişafına yeni imkanlar açıb, turizm ehtiyatlarının öyrənilməsi, genişləndirilməsi, turistlərin tələbatının ödənilməsi üçün zəruri xidmətlərin təşkili və müasir standartlara uyğunlaşdırılması, sanatoriya-kurort imkanlarının genişləndirilməsi, mehmanxanaların və digər turizm obyektlərinin sayının artırılması, turizm marşrutlarının çoxaldılması  istiqamətində böyük işlər həyata keçirilib. Son zamanlar müsəlman ölkələrindən ölkəmizə çoxsaylı turist axınını və cari ilin may ayında ölkəmizdə keçirilən IV İslam Həmrəyliyi Oyunları öncəsi halal turizmlə bağlı beynəlxalq təcrübənin öyrənildiyini deyən İnstitut rəsmisi "Turizm ekskursiya xidmətləri. Halal idarəetmə sistemi. Mehmanxanalar" standartının tətbiqinin də məhz bu zərurətdən irəli gəldiyini qeyd edib. Bildirib ki, sözügedən standartlar  halal turizm fəaliyyətlərindən biri olan halal xidmət göstərən mehmanxanalar başda olmaqla istirahət mərkəzləri, motellər və digər mehmanxana tipli obyektlər üçün "Halal İdarə Sistemi"ni əhatə edir: "Müsəlman turistləri cəlb etmək məqsədi ilə onların halal prinsiplərə uyğun olaraq yaşayışının, qidalanmasının və asudə vaxtlarının səmərəli keçirilməsi üçün stdandartda bir sıra tələblər öz əksini tapmışdır. Belə ki, bu tələblərə uyğun fəaliyyət göstərən mehmanxanalarda alkoqol və donuz əti istifadə olunmur, yalnız halal prinsiplər əsasında hazırlanan yeməklər və şəxsi gigiyena vasitələri istifadəçilərə təqdim edilir. Həmçinin kişilər və qadınlar üçün ayrıca su hovuzu və spa xidmətləri göstərilir. Bir sözlə müsəlman turistlərin yaşayışı, turların təşkili və digər səmərəli istirahəti üçün bütün tələblər bu standartda nəzərə alınır". Mədəniyyət və Turzim Nazirliyinin sektor müdiri Mahir Qəhrəmanov qeyd edib ki, son dövrlərdə ölkəmizdə turizmin inkişafı istiqamətində kifayət qədər vacib işlər görülüb. Onun sözlərinə görə, Azərbaycanın müsbət turizm imicinin yaradılması və turizm məkanı kimi tanıdılması istiqamətində aparılan məqsədyönlü tədbirlər ölkəyə gələn turistlərin sayının artımına öz töhfəsini verib. Belə ki, Körfəz ölkələri, eləcə də Çin, Koreya, Yaponiya, Malayziya və Sinqapur ilə münasibətdə sadələşdirilmiş viza sisteminin tətbiqi mövcud turist axınına müsbət təsirini göstərib, bu ölkələrin əksəriyyətindən ölkəmizə gələn müsəlman turistlərin sayında əsaslı artım qeydə alınıb.  Belə ki, 2015-ci illə müqayisədə 2016-cı ildə Azərbaycana İordaniyadan 2 dəfə, Küveytdən 3,2 dəfə, Qətərdən 5,5 dəfə, Səudiyyə Ərəbistanından və Omandan 10 dəfə, Birləşmiş Ərəb Əmirliklərindən 22 dəfə, İraqdan 30 dəfə çox turist gəlib. 2016-cı ilin ilk 3 ayı ilə müqayisədə 2017-ci ilin müvafiq dövründə İrandan 2 dəfə çox turist gəlib. Sektor müdirinin sözlərinə görə, cari ilin mart ayında Novruz bayramı münasibətilə İrandan gələn turistlərin sayı yetmiş minədək artmışdır. Azərbaycan Akkreditasiya Mərkəzinin ekspert-auditoru Əkbər Əliyev halal idarəetmənin turizm sektorunda yeni istiqamət olduğunu, beynəlxalq təcrübədə populyarlıq qazandığını deyib. Artıq bir çox islam ölkələrində turizm və otelçilik sahəsində halal prinsiplər əsasasında xidmətlər göstərilir. Təkcə 2016-cı ildə müsəlman turistlər səyahətlər zamanı 140 milyon ABŞ dolları xərcləyib. Bu rəqəmin 2020-ci ilədək 180 milyon ABŞ dollarına qədər artacağı gözlənilir. Halal məhsulların sertifikatlaşdırılması üzrə akkreditasiya olunmuş "AzeSERT HALAL" MMC -nin direktoru Elşad Əliyev isə bildirib ki, hazırda bir çox ölkələrdə halal turizimlə bağlı standartlar və sertifikatlaşdırma sxemləri qəbul edilib. Artıq bu standartın tələblərinə uyğun sertifikatlaşdırılmış mehmanxana şəbəkələri dünyanın müxtəlif ölkələrində xidmət göstərir. Hətta müsəlman turistlər üçün internet üzərindən halal prinsiplər əsasında fəaliyyət göstərən mehmanxanaların axtarış sistemi də tətbiq edilir. Sadalanan faktlar bir daha deməyə əsas verir ki, ölkəmiz üçün halal turizm standartlarının tətbiqi vacibdir və onun reallaşdırılması ilə iqtisadiyyatın dayanıqlı  inkişafını təmin etmək mümkündür. Nəzərə almaq lazımdır ki, son vaxtlar Azərbaycan turistlər ən çox müsəlman ölkələrindən gəlir.

Zəka 

Maraqlı xəbərləri Olaylar.Az Facebook səhifəmizdən izləyin.

Şərh yaz:

DİGƏR XƏBƏRLƏR