Banklara möhlət hüququ veriləcəkmi?

Nazirlik: "Vergilər Nazirliyi qanunun qüvvəyə minməsi ilə bağlı müddəti dəyişdirə və ya möhlət verə bilməz" 
 

Vergi Məcəlləsinə edilən əlavə və dəyişikliklər cari ilin yanvar ayının birndən qüvvəyə minib. Lakin yayılan məlumata görə, qanunun tətbiqi ilə bağlı müəyyən çatışmazlıqlar olduğundan bu müddətin dəyişdirilməsi təklif olunur. Daha dəqiq, banklar qanunun tətbiqi ilə baəlı möhlət hüququ əldə etmək istəyində bulunublar. Bu arada Vergilər Nazirliyi və Azərbaycan Banklar Assosiasiyası (ABA) vergi qanunvericiliyinə edilən dəyişikliklərin tətbiqi ilə bağlı banklara verilən möhlət məsələsinə birgə münasibət bildirib. Məlumatda qeyd olunur ki, vergi qanunvericiliyinə edilən dəyişikliklər 2017-ci il 1 yanvar tarixindən etibarən qüvvədədir və burada nəzərdə tutulan vergilər bu tarixdən etibarən hesablanmalıdır: "Bu məqsədlə elektron ticarətin vergiyə cəlb olunması ilə bağlı texniki məsələlərin həll edilməsi istiqamətində Vergilər Nazirliyi ilə Azərbaycan Banklar Assosiasiyası arasında sıx şəkildə əməkdaşlıq edilir. Banklar tərəfindən qısa müddət ərzində qanunvericiliklə müəyyən olunmuş vergilərin hesablanması ilə bağlı müvafiq texniki məsələlər həll edildikdən sonra vergi ödəyicisi kimi uçotda olmayan şəxslər tərəfindən elektron ticarət qaydasında qeyri-rezidentlərdən alınan iş və xidmətlərə görə onlara aparılan ödəmələr və qeyri-rezident şəxslərə məxsus elektron pul kisələrinə pul vəsaitlərinin köçürülməsi üzrə əməliyyatlar təhlil ediləcək, qanunla müəyyən olunmuş qaydada vergilərə cəlb edilməmiş əməliyyatlar üzrə vergilərin tam məbləğdə hesablanması və dövlət büdcəsinə ödənilməsi, habelə qanunla müəyyən olunmuş qaydada vergilərin hesablanması nəzərdə tutulmayan əməliyyatlar üzrə tutulmuş vergilər üzrə alıcılarla (müştərilərlə) yenidən haqq-hesab edilməsi təmin ediləcək". Vergilər Nazirliyinin Vergi siyasəti və strateji araşdırmalar departamentinin baş direktoru Samirə Musayeva deyib ki, "Vergi Məcəlləsinə edilən sonuncu dəyişikliklərlə əlaqədar banklarda proqram təminatı yenilənir". Onun sözlərinə görə, qanunlar qəbul olunana və Vergi Məcəlləsinə dəyişikliklər qüvvəyə minənə qədər Vergilər Nazirliyi və Banklar Assosiasiyasına üzv olan bankların 70-ə yaxın nümayəndəsi ilə görüş keçirilib: "Qanunun tətbiqi ilə bağlı yarana biləcək bütün suallara ətraflı cavab verilib. Təkrarən Vergilər Nazirliyində Banklar Assosiasiyası ilə geniş tərkibdə görüş keçirilib. Qanunun tətbiqi ilə bağlı müddəa yalnız qanunun özündə göstərilir. Heç bir mərkəzi icra hakimiyyəti orqanı və Vergilər Nazirliyi qanunun qüvvəyə minməsi ilə bağlı müddəti dəyişdirə bilməz və ya möhlət verə bilməz. Bizim Banklar Assosiasiyası ilə səmərəli əməkdaşlığımız davam edir. Biz hesab etmirik ki, bu qanunun tətbiqi ilə bağlı banklarda hər hansı bir qeyri-müəyyən suallar var. Təbii ki texniki olaraq banklarda müəyyən proqram təminatında sazlama işləri gedir. Bu müddət ərzində mütəmadi olaraq hətta görüşlər keçirilməsə belə texniki sualların dərhal ardan qaldırılması ilə bağlı işçi qrup yaratmışıq. İşçi qrupa vergilər nazirinin birinci müavini rəhbərlik edir. Bu işçi qrupda biz gündəlik olaraq yarana biləcək sualların aradan qaldırılması üzərində işləyirik". S. Musayeva əlavə edib ki, elektron ticarət vasitəsi ilə alınan mallara vergi tətbiqi ilə bağlı qanunda müddəa yoxdur: "Sadəcə olaraq qeyri-rezident tərəfindən vergi ödəyicisi olmayan fiziki şəxslərə işlərin görülməsi və xidmətlərin göstərilməsi zamanı banklar tərəfindən ödəmə mənbəyində vergi tutulması nəzərdə tutulub. Bunu banklar da bilir. Hər hansı bur bankın qanunla müəyyən olunmuş vergidən başqa digər vergi tutması halı mövcuddursa, bununla bağlı ona xidmət edən banka müraciət etməlidir. Banklar da həmin uyğunsuzluqların aradan qaldırılması üçün qanunla müəyyən olunmuş tədbirləri görməlidir. Yəni, bu Vergilər Nazirliyi və banklar arasında yaranan sual deyil. Bu, müştəri və banklar arasında yaranan sualdır. Bu da hər hansı bankda texniki yenilənmə ilə bağlı ola bilər və bu problemi qısa zamanda aradan qaldırmaq mümkündür. Vergi Məcəlləsində ödəmə mənbəyində vergi tutma səlahiyyəti olan subyektlərin dairəsi dəqiq göstərilib. Əgər həmin subyektlər tərəfindən Vergi Məcəlləsində müəyyən olunmuş vergidən başqa digər vergi tutulursa, bu texniki səhvdir. Belə halda müştəri hesabı olan subyektlərə müraciət etməlidir".

Nurlan 

Maraqlı xəbərləri Olaylar.Az Facebook səhifəmizdən izləyin.

Şərh yaz:

DİGƏR XƏBƏRLƏR