Yeni mövsüm “Sonuncu” ilə başlayacaq

Sentyabrın 22-də Azərbaycan Dövlət YUĞ Teatrı yeni mövsümü açacaq. Teatr 30-cu mövsümə Pərvinin əsəri əsasında hazırlanmış "Sonuncu" tamaşası ilə başlayacaq. Olaylar.az bildirir ki, Xalq artisti Ramiz Həsənoğlunun quruluşunda hazırlanan tamaşada rolları Əməkdar artist Fərhad İsrafilov, aktyorlar Hikmət Rəhimov və Ləman Novruzova ifa edirlər. Səhnə əsərinin quruluşçu rəssamı Ramiz Həsənolu, geyim üzrə rəssamı Nana-Burxan, musiqi tərtibatçısı Əlibala Qasımovdur. Qrafika işləri Əhməd Məcidov və Nazim Sadıqova məxsusdur.

Dahi A.P.Çexovun yaradıcılığından bəhrələnərək yazılmış pyesdə hadisələr müasir dövrə uyğunlaşdırılıb. Müəlliflər sənətkar taleyi məsələsinə müasir baxım bucağından yanaşmağa çalışıblar. Tamaşada qocaman aktyor Əlisöhbət Qələndərlinin timsalında sənət adamlarının taleyi, yaşantıları və düşüncələri ifadə olunub. Burada ömrünü sənətə həsr etmiş və yaşının ixtiyar çağında bəzi səhvlərini dərk etmiş insanın faciəsi qabardılır.

Sentyabr ayında YUĞ Dövlət Teatrında ümumilikdə 5 tamaşa nümayiş olunacaq. Teatr sentyabın 23-də "Fəna" (O.Fikrətoğlu), 28-də "Medeya.Sekvensiya-01" (V.Klim), 29-da "Təklif. Elçilik" (A.P.Çexov), 30-da "Quş dili" (T.Vahid) tamaşaları ilə tamaşaçıların görüşünə gələcək.

Maraqlı xəbərləri Olaylar.Az Facebook səhifəmizdən izləyin.

Şərh yaz:

DİGƏR XƏBƏRLƏR