Çörəklərin gigiyenik və uyğunluq sertifikatı yoxdur

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Binəqədi qəsəbəsi 2-ci mədən ərazisində yerləşən "MAKO" kiçik müəssisəsində aparılan yoxlama zamanı müvafiq icra hakimiyyəti orqanının icazəsi olmadan "MAKO" əmtəə nişanlı "Dietik" və "Pəhriz" çörəklərinin istehsal olunduğu aşkar edilib. Bu barədə İİN-dən verilən məlumata görə, həmin çörəklərin etiketində istehsal tarixinin göstərilmədiyi, xammalın saxlanma şəraitinin normativ-texniki sənədlərin tələblərinə uyğun olmadığı müəyyən edilib. Bununla əlaqədar hazır məhsul və xammaldan nümunələr götürülərək laboratoriya müayinəsinə göndərilib. Müəssisədə olan hazır məhsulların etiketlərindəki son istifadə tarixi əsasında onların saxlama müddəti araşdırılarkən, bu müddətin normativ-texniki sənədlərlə müəyyən edilmiş müddətlərdən artıq göstərildiyi aşkar olunub. Bununla da "MAKO" kiçik müəssisəsi istehlakçıları çaşdırmaqla haqsız rəqabətə yol verib. Götürülmüş nümunələrin laborator müayinələrinin nəticəsinə əsasən müəssisədə xammal kimi istifadə edilən çovdar səmənisində ekstraktın kütlə payı normadan az, Borodinskiy" çovdar çörəyində isə normadan artıq olub. Qeyd olunanlarla əlaqədar "Pəhriz" və "Dietik" çörəklərinin istehsalının və anbarda olan 30 ton çovdar səmənisindən çörək istehsalı üçün istifadə edilməsinin dayandırılması, habelə "Borodinskiy" çovdar çörəyinin istehsalının normativ sənədlərə uyğunlaşdırılması barədə göstəriş verilib.